النهارده هنعرف مع بعض إجابات عن الأسئلة اللي بتحيّر كل البنات..
خصوصا مشكلة الحبوب والبقع والآثار الناتجة عنها..
وكمان مشكلة الهالات السوداء وإزاي نعالجها، تابعونا.
إزاي أقدر أعالج الحبوب.. وإمتى أعرف إني لازم أروح للدكتور؟
الحبوب دي بتبقى مزعجة جدا لكل البنات والشباب، ودي فيه منها أنواع كتيرة؛ فيه حبوب صغيرة، وفيه حبوب تحت الجلد، وفيه حبوب بتبقى كبيرة وعاملة زي الدمامل ودي
بتبقى مؤلمة أوي، وبتحتاج لعناية فائقة جدا ومتابعة لحد ما تتعالج، ومن الحاجات المهمة أوي هي الاهتمام بالنظافة الشخصية، وأهم حاجة لازم نغيّر الملاية يوميا أو على الأقل
نغيّر كيس المخدة علشان لو فيه يوم كان وشنا فيه مشكلة ماتتنقلش تاني يوم، وتاني حاجة نغسل وشنا بغسول أو صابون يكون فيه نسبة طين مغربي أو أردني، وده بيساعد على
إزالة الحبوب ومفيد لأي نوع بشرة فيها حبوب، كمان ممكن تستخدم أي نوع صابون فيه أعشاب زي الروزماري، وإن شاء الله هنقدّم لكم طريقة عمل صابون بالأعشاب.
بعد ما نكون جرّبنا كل الحاجات دي وماعملتش نتيجة ساعتها نروح لدكتور تجميل، وخصوصا لما تكون الحبوب من النوع الكبير اللي بتعمل دمامل، ودي بيبقى علاجها
بالسنفرة أو بالليزر، بس عايزة أقول لكم على وصفة مخصوص للحبوب الكبيرة دي؛ وهي إنك تجيبي عسل نحل وزيت كبد الحوت بمقادير متساوية، وتخلطيهم وتحطّيهم في
الثلاجة، وتدهني منه كل يوم على بشرتك لمدة 3 : 4 ساعات، وتستمري عليها يوميا لمدة 3 شهور، وإن شاء الله هتجيب نتيجة من أوّل شهر، ولو جربتي الوصفة دي ولو
مالقيتيش نتيجة يبقى لازم تستشيري دكتور تجميل يكون موثوق فيه علشان العلاج مايجيبش نتيجة عكسية.
إزاي أعالج آثار الحبوب والبقع الناتجة منها؟
علشان نعالج البقع دي ممكن نجرّب الوصفة دي؛ وهي إنك تخلطي عصير فجل بلدي + عصير ليمون + شرش لبن الزبادي (المية اللي بتطلع من الزبادي لما نسيبه شوية)،
وبعدين هنحط المكوّنات دي بمقادير متساوية، ونحفظهم في برطمان زجاج، ونسيبه في الثلاجة لمدة 48 ساعة، وبعدين نبدأ نستخدمه يوميا، ونحط منه على أماكن البقع لمدة 15
: 20 دقيقة ونشطفه بالمية، وبعديه ندهن وشنا بزيت اللوز الحلو.
الماسكات اللي باستخدمها بشكل يومي هل أحطها مع بعض؟
الماسكات هنحطها حسب المشكلة اللي عندنا؛ يعني لو هنعالج الحبوب يبقى هنحط ماسك الحبوب اللي قلنا عليه، ولو مافيش حبوب بس عاملة بقع وسايبة أثر يبقى هنعمل
ماسك الفجل، لو عايزة تفتّحي بشرتك يبقى هنعمل ماسك حبة البركة والأرز، وإحنا نقدر نعمل ماسكين كحد أقصى للبشرة، وتابعونا الفترة الجاية هنقول لكم الماسكات اللي
تنفع مع بعضها في يوم واحد من غير ما تضر البشرة.
ان شاء الله واحيان بكرة معادنا مع موضوع الهالات السودا اللى تحت العين أسبابها وطرق علاجها
مع اطيب التمنيات