عرب شمس (شعر)

موضوع: عرب شمس (شعر) الخميس يناير 20, 2011 3:55 pm

شعر خاص بقرية عرب شمس - فاقوس - محافظة الشرقية

لمّا زمان..

بتهف عليّا .. ريحة الخضرة

كنت اتشعبط فـ الرايحين

يمّة .."شمس" الريف

قرية .. يشدك فيها الحقْ ,

تعد الناس ..

بطيبة كل أفراد الغيط

رغم الضلمة ,

ورغم البردْ ,

ترش الدفء ..عيون الخلقْ ,

كنت اتسحّب جنب الحيط

لحديت م ادخل ..

بيت "شبراوي أبو حسنين"

كل شباب الحارة ..أتلموا

الأطفال أنحشروا فـ ركن

- قبل م اشغّل..

كله يطلّع إلـ "خمس أبيض" ,

أما العيل يدفع قرش

واما تغيب الشمس ..

كنت أستنى ..

اللحظة .. بلحظة ,

جوّه اللمّة ..

ياللا .. الهمّة ..

"حسن الأعرج" .. وحش "الطيبة"

مين يتقدم ..؟ مين يتحدى ..؟!

"حسن الأعرج" .. لم القعدة

كله يخاف من ظرّة لـ " اعرج "

لمّا.. البصرة .. يهفْ ,

يخلّي .. الضلمة ترفْ ,

حتّى اللمبة الجازْ ..

كان دايما تنحازْ ,

خوف من لـ "اعرج"

كنت باشوف ..

لسانها بيرقص ..لمّا يفوز

كان الناس ..

بقلوبها البيضة .. تحن , ترقْ ,

كانوا سواقي ..

مربوطين فـ كلمة صدقْ ,

رغم الضلمة ,

ورغم البرد ,

ترش الدفء ..عيون الخلقْ ,

شوف لـ "محيلي"

لمّا يجز .. بطيبة قلبه ..

صوف الغالي ,

وبعد شويّة ..يروّق دقنك ,

عم "السيد" ..

عمره ماحط فـ باله الفرقة ,

كان يعز الكل ..

حبيب .. وانسان ,

عمره ما يبعد عن محتاج ..

أيّاً كان ,

لما تنادي ..يجيلك ..شايل

كل صالونه ..

تحت أباطه ..ف أيّ مكان !!

وأمّا تعوزه يصير دكتور ..

يصير دكتور ..!

عم "السيد" ..كان يقول :

ـ الفرق .. الورقة ,

كان تشخيصه .. دايما صح !!

لمّا يقول .. ح يموت ..

الموت دا .. أكيد !

وان حد عدّا ..

يبقى خلاص ..

ربي كتب له ..عمر جديد !

كان الناس ..

بقلوبها البيضة ..تحن ..ترقْ

رغم الضلمة ,

رغم البرد ,

ترش الدفء .. عيون الخلقْ

من دا بكرة بقرشين ..

منظر .. يسحب قلبك منك

عجل مربّط بالأطفال

كله يزق ..

يزف الغالي ,

عمك "فرحان" ..

عنده السواطيرْ ,

بكرة الموسم ..

قرّب ياأميرْ ,

كان الموسم ..يعني اللمّة ,

يعني الريف بطيبة أهله ,

لم الكل مابين دراعاته

كل افراد القرية حياته

قرية .. يشدك فيها الحق

تعد الناس ..

بطيبة كل أفراد الغيط .

سبت القرية ..

ودبت ف همي ,

شفت مرار الزمن وليله ,

عشت الهم ..

بقلبي ودمي !

لفّ الوقت ..

ساعات الغربة.. سنين وسنين

شوق يرميني .. يمّ القرية ,

والله وحشني ..

الغيط, والمولد ,

شدت روحي ..

الناس, والترعة

قلت : أشعبط ف الرايحين ..

يمة شمس الريف ,

قرية.. أتغير فيها الكل ..

هدت كل بيوت الطين ..

مباني لـ فوق ,

شقّت كل قلوب الخلق ..

السوق ,

هرب الغيط ..

من تحت زحام لـ بيوت ,

ماتت .. جوّة الناس .. اللمّة ,

هبّت فيهم .. ريح الغربة ,

قلعت .. كل شباب القرية ,

سابوا الفيط ..

وسابوا الهمّة ,

رغم النور ,

ورغم العز ,

حل الشق ..

ترش الحقد ..

عيون الخلق ,

يموت الموسم ..

جوّة الحلق

أجري ..

اتشعبط فـ الطالعينْ

أذكر إنه ..

كان في قرية

يشدك فيها الحق

تعد الناس ..

بطيبة كل أفراد الغيط ,

رغم الضلمة ,

ورغم البرد ,

ترش الدفء .. عيون الخلق

توقيع
إبراهيم سالم العقيلي

شكراُ وتسلم ايدك

كلام طيب جميل

كلام جميل جدا جدا

ومحسوس اوى بجد

تسلم ايدك يا هيمه

ربنا يوفقك

هو مش محسوس اوي

بس يلا حلو حلو